भारत की संस्कृति के लिए... भाषा की उन्नति के लिए... साहित्य के प्रसार के लिए
मुट्ठी भर उजियाळौ (3) / संजय आचार्य वरुण
Kavita Kosh से
घुप्प अंधारै में
डूब्यो एक सैर
ताकतौ उम्मीद सूं
आभै खांनी
सोधतो
आपरै खातर
कोई सूरज।
बाबा आदम रै जुग री
बूढ़ी इमारतां री
भींत्यां री सेर्यां में
ऊग्योड़ा
आक रा पौधा
अडीकै भींत्यां रै
और फाटण ने।
निजर बचाय
खिसकणै री फिराक में
चंदरमा
देय जावे
मुट्ठी भर उजियाळौ।
अचाणचक
चुंधियाय जावै
अंधारै सैर री आँख्यां
हड़बड़ा जावै
सूरज सूरज करतौ सैर।
