भारत की संस्कृति के लिए... भाषा की उन्नति के लिए... साहित्य के प्रसार के लिए
म्हैं मरुधर री जायी हूं / इरशाद अज़ीज़
Kavita Kosh से
बगत री लूवां रा
थपेड़ा खावती
म्हारी मायड़ भासा
थूं हिम्मत मत हारजै
बताय दै आं मौकापरस्त लुटेरां नैं
अर कैय आंनै कै
लगावो थांरो जोर
बतावो थांरी औकात
म्हैं मरुधर री जायी हूं
काचरिया री कुचमाद सूं
कदैई नीं डरूं
म्हारै खांडां री धार
अजै तांई कुंध नीं पड़ी
माथो देवां तो लेवणो भी जाणां
पीठ दिखावणो म्हैं नीं जाणां
साच नैं आंच नीं हुया करै
जे देखणो चावो
तो देखो इतियास नैं
देवो जवाब जे थांरै कनै हुवै
कांई हुयो? गिणतीं नीं हुवै!
म्हे चुप हां, इणरो मतलब समझो
थे ई जाणो हो कै
हर सरणाटै रै बाद
तूफान आवै
अर जद बो आवै
तो कांई छोडै है लारै!
