भारत की संस्कृति के लिए... भाषा की उन्नति के लिए... साहित्य के प्रसार के लिए
रूणीचै रो राज अठै / राजेन्द्र जोशी
Kavita Kosh से
रूणीचै रो राज अठै
धाम रूणीचो आप अठै
अजमल घर अवतार अठै
नेतल री मनवार अठै
डाळी बाई रो प्रेम अठै
बो रामदेव राजा अठै।
पैदलियां रो ठौड़ अठै
कुआ-बावड़ी भरै अठै
जैकारां री जै अठै
बाबा थारा पीर अठै।
मिसरी रो बण्यो लूण अठै
बिणजारो जद पगां पड़्यौ
लूण री मिसरी अबै बणै
बा लूण री मिसरी बणी अठै
बो रामा पीर अबै अठै।
अमीर-गरीब री बात कठै
ऊंच-नीच रो नांव कठै
जयकारै री जै अठै
लाग्योड़ै रा घाव कठै
पगां रा छाला अबै कठै
जद रामदेव राजा अठै
पीरां रो पीर अबै अठै।
सगती-भगती अबै अठै
भगती भाव रो मेळ अठै
आंधळियां री आंख अठै
बाबा थारो धाम अठै
हवा में घोड़ो उडै अठै
रूणीचै रो राज अठै
रामदेव राजा अठै...।
