भारत की संस्कृति के लिए... भाषा की उन्नति के लिए... साहित्य के प्रसार के लिए
रूसणौ / सत्यप्रकाश जोशी
Kavita Kosh से
भलां ई जुपावौ दीवा मै‘ल में
भलां ई सजावौ फूलां सेज।
कोनी छोड़ां ओ म्हारा रूसणा।
भलां ई लडावै म्हांनै दूतियां,
भलां ईं मनावौ म्हांनै कांन्ह।
कोनी छोड़ां ओ म्हारा रूसणा।
वरण क्यूं दियौ थे छांनै बादळयां,
हांसी क्यूं दीवी छांनै बीज।
कोनी छोड़ां ओ म्हारा रूसणा।
पुहपां नै छांनै मीठा मुळकणां,
कोयल नै दिया छांनै बैण।
कोनी छोड़ां ओ म्हारा रूसणा।
नदियां रळकंतां थांनै कुण बरजिया,
छांनै क्यूं सांस भराई पूंन।
कोनी छोड़ां ओ म्हारा रूसणा।
प्रीत करतां थांनै कण बरजिया,
छांनै क्यूं कांमणियां नै नेह।
कोनी छोड़ां ओ म्हारा रूसणा।
रूसणौ बुलावै नैड़ा पीव नै,
रूसणौ बधावै झाझा हेत।
कोनी छोड़ां ओ म्हारा रूसणा।
