भारत की संस्कृति के लिए... भाषा की उन्नति के लिए... साहित्य के प्रसार के लिए
रेत (सात) / राजेन्द्र जोशी
Kavita Kosh से
कदैई नीं थकै
आपरै दरद रो
बखाण नीं करै
सैवती रैवै
अणथाग भार
आपरी जवान छाती माथै रेत।
पी जावै
दूजां रा दुख
नीं व्हाळा खतम कर सकै
करावो चालतो रैवै रेत माथै
कपाळ-क्रिया नीं कर सकै।
कित्ती मीठी है
जहर उगावै
पण खुद ज्हैरीली नीं हुवै
बा ई इमरत उगाय देवै
हंसती-हंसती गावती रैवै
मिनख री चामचोरी रा गीत
जवानी रो रंग दिखावती
बूढी नीं हुवै रेत।
