लोकमान्य बाल गंगाधर तिलक / हूँदराज दुखायल
तर्ज़: तो अची मौज में मोहन जा वॼाई मुरली
खिदमते मुल्क में हरदम थी तूं मखदूम रहीं,
पंहिंजे हर मर्द इरादे ते थी महकूम रहीं,
जुल्मु सहंदे तूं ज़माने जो , थी मज़लूम रहीं,
बेगुनाहीअ सां तूं पीरीअ में भी मासूम रहीं,
देश शेवा जो अखरु तो न भुलायो हरिगिज़।
सिरु कॾहिं जुल्म जे सामुहूं न झुकायो हरिगिज़॥
क़ौम ऐं मुल्क जो हरदम तोखे हमदर्द चऊं,
साहिब हिम्मत चऊं, हौसलेमंद मर्दु चऊं,
मादरे हिन्दु जो तोखे ई सचो फर्दु चऊं,
नांव नेकीअ में था फरज़न्द अरज-मंद चऊं,
तुंहिंजी कोशिश जो वॾो हिन्दु ते थियो आहे असरु,
कौम ऐं मुल्क जा शैदा था अचनि खूब नज़र॥
हिन्दु खे स्वराज जो सुरतार ॿुधायो तोई,
राॻु ही ‘सेल्फ गवर्नमेंट’ जो ॻायो तोई,
ख्वाबे - ग़फलत मां आ सुतलनि खे जॻायो तोई,
साफु भुललनि खे सची राह बताई तोई,
खुद वञी जेल में तो जेल जे ॾर खे मेटियो,
हथ कड़ियूं पाए हथनि में तो ख़तर खे मेटियो
मादरे हिन्दु जो अॼु कीन सूंहें थो मस्तक!
रोॼु मुल्कनि में मतो हाइ तिलक, हाइ तिलक!
बाग - भारत मां गुलनि जो ही उॾामी वियो कंटक,
ज़ुल्म थी ज़ुल्म मथां तुंहिंजो रहियो आहे फलक,
तुंहिंजी तस्वीर फिरे हिन्द जे नेणनि में सदा,
तुंहिंजी तमसील तिलक देस दुखिये लाइ दवा।
