भारत की संस्कृति के लिए... भाषा की उन्नति के लिए... साहित्य के प्रसार के लिए
समय रहत ले अरे चेत / अरुण कुमार निगम
Kavita Kosh से
रुखराई ला काट काट
नदिया नरवा पाट पाट
नँगत बनाये नगर हाट
करत हवस का रे लुवाट।
सहर लील गिन हमर खेत
लाँघन किसान लइका समेत
सपना मन बन गिन परेत
समय रहत ले अरे चेत।
चेताइस केदार नाथ
भुइयाँ के झन छोड़ साथ
नइ तो हो जाबे अनाथ
कुछू नहीं हे तोर हाथ।
जेला कहिथस तँय विकास
वो तो भाई हे बिनास
समझावय धरती अगास
भुइयाँ ला झन कर हतास।
हरियर कर दे खेत-खार
जंगल के कर दे सिंगार
रोवय झन नदिया पहार
पीढ़ी-पीढ़ी ला उबार।
