भारत की संस्कृति के लिए... भाषा की उन्नति के लिए... साहित्य के प्रसार के लिए
सरकारें एलान करै छै / ब्रह्मदेव कुमार
Kavita Kosh से
जिनगी में ऐतै जे बहार, सरकारें एलान करै छै।
कोय नै आबेॅ रहतै बेरोजगार, सरकारें एलान करै छै॥
सुनोॅ-सुनोॅ मजदूर, भैया, बहिन सब
आबेॅ नै रहथौं, लोरोॅ से आँख डबडब
सब्भै केॅ मिलथौं रोजगार, सरकारें एलान करै छै॥
आबेॅ नै भूखोॅ सेॅ, पेट कुलबुलैथौं
नै बच्चा-बुतरू, दूधोॅ लेॅ कुनमुनैथौं।
सुखोॅ के बहतौं बयार, सरकारें एलान करै छै॥
नै जैह्योॅ दिल्ली, पंजाब, हरियाणा
बंगाल-असम के नै करिहोॅ ठिकाना।
घरै में मिलथौं रोजगार, सरकारें एलान करै छै॥
आपनों परिवारोॅ के, नाम दर्ज कराबोॅ
पन्द्रह दिनोॅ में, जाँब कार्ड पाबोॅ।
सालोॅ में सोॅ दिन रोजगार, सरकारें एलान करै छै॥
मिलथौं निर्धारित न्यूनतम मजदूरी
महिला-पुरूष के बराबर मजदूरी।
आबेॅ नै रहतै कोय लाचार, सरकारें एलान करै छै॥
