सुञाणप / लछमण भाटिया 'कोमल'
मूं तो तरफ़ को रुखु़ न कयो
पोइ बि मुंहिंजे ज़िंदगीअ जो
रुखु बदिलिजी वियो।
बक़ौल शेक्सपीयर:
‘दुनिया हिक स्टेज आहे’
त इन स्टेज ते मूं हिकु
अहिड़ो रोल अदा कयो आहे,
जेको मुंहिंजीअ मरज़ीअ खि़लाफ़
मूंखे सौंपियो वियो हुओ
ऐं ही रोलु हाणे-
हिकु कौड़ो सचु बणिजी
मूंखे डंगे रहियो आहे।
जॾहिं बुढापे जी ॿेड़ी-
लहन्दड़ सिज जे पोयें पाछे जियां
वक़्त जे कुन में ग़ोता खाइण थी लॻे
ऐं अहसासु ॾियारे थी
त वक़्त जे हथनि
जॾहिं शतरंज जे मुहिरे वांगुरु
मूंखे हिक ख़ाने खां ॿिए ख़ाने में
खिसकाए छॾियो आहे
त ॼणु मुंहिंजी जूणि ई
मटिजी वेई आहे।
हिन नईं जूणि में-
मुंहिंजे वजूद जे थर्मा मीटर में
ज़िन्दगीअ जे हर गुनाह ऐं
सवाब जे अहसास जो पारो
फहिलिजी- हेठि मथे लही चढ़ी रहियो आहे
अजु मां पुठि वराए
पंहिंजनि इन्हनि बुलंद ख़्वाह बदकार
रोलनि खे ॾिसी रहियो आहियां
जिनि खे अदा करण लाइ मूं घुरबलु
मेक-अप बि कयो हो।
अजु मां उहे सभु मुखौटा लाहे
फिटा करणु थो चाहियां,
पर करे नथो सघां।
छो जो ज़िंदगीअ जी स्टेज ते
हाणे इहाई मुंहिंजी सुञाणप आहे
ऐं पंहिंजीअ इन्हीअ ई सुञाणप सां
उमिरि जो ही पोयों पहरु गुज़ारिणों आहे।
