भारत की संस्कृति के लिए... भाषा की उन्नति के लिए... साहित्य के प्रसार के लिए
सुण ले विनती / कमल सिंह सुल्ताना
Kavita Kosh से
हे इंदर कद आसी
सूना होग्या है खेत
बाटाँ जोय रिया है करशा
इण मुरधर सूँ मती रूठ
सदियाँ सूँ रूठौ रियो है
पण आज राजी होजा
मत कर सौतेलो बर्ताव
म्है टाबरियाँ हां थारां
म्हां पर म्हैर कर
थारे बिना कोई सहारा कोनी
जिनावर तो जिनावर
मिनख भी प्यासा मर रिया है
म्है कठै जाऊं
मारग बंद व्हैग्या है
म्हारी ऊजळी खेती रै साथै
खतम व्है ग्यो है
भविष्य म्हारा टाबरियां रो
वा लीकां खींचीज गी है
म्हारा टाबरियाँ रे हाथां ऊपर भी
जिण सूँ म्हैं अळगा राखणा चावूं
एकर सुण ले अर्जी
इतरो भूण्डो मती बण
सुण ले म्हारी अरदासां
एकर आ जा
सुण ले म्हारी विनती
एकर देठाळो दे जा
