भारत की संस्कृति के लिए... भाषा की उन्नति के लिए... साहित्य के प्रसार के लिए
सेल्फी का यहु रोगु / प्रदीप शुक्ल
Kavita Kosh से
नवा रोगु यहु
सेल्फी वाला
खुब फलि फूलि रहा
द्याखौ बरसाती नदिया मा
फिरि लरिकवा बहा
सेल्फी मतलब
हमही हम हन
अउर न कउनो दूजा
हमरे नथुना बाघ सरीखे
तुम पंचै सब चूजा
कबौ कबौ सेल्फी मा द्याखै
हमका बैलु मरकहा
काका कै
सेल्फी जग जाहिरि
वई रोगु फईलाईनि
तब ते सेल्फी के चक्कर मा
केतने जान गवाँईनि
मन की बात म ब्वालौ काका
सुनैं तुम्हार कहा
रोजु मरैं
सेल्फी ते बीसन
डेंगू ते दुई चारि
सेल्फी का टीका डेंगू ते
पहिले लेव निकारि
तुमही आगि लगायो काका
तुमहि करौ मिनहा
