भारत की संस्कृति के लिए... भाषा की उन्नति के लिए... साहित्य के प्रसार के लिए
हंस बेचारा टौव्वावै छै / दिनेश बाबा
Kavita Kosh से
हंस बेचारा टौव्वावै छै
कौआ मस्ती में गावै छै
एक टांग पर बौगला खाड़ोॅ
मछरी सब केॅ भरमावै छै
गीत सुनै छै के कोयल के
गदहा भी नैं शरमावै छै
जेबकतरा भारी पुलिस पर
शेर पर गीदड़ गरमावै छै
कॉलर पकड़ी करी सिपाही
केॅ चौर्है नें धमकावै छै
सीधा-सच्चा ईसानोॅ के
तकदीर्हौं नें तरसावै छै
दुष्ट, दुराचारी पर किरपा
भगवानो जी देखलावै छै
घूसखोरोॅ के घरोॅ में आबेॅ
सरसत्ती, लछमी आवै छै
बेईमानोॅ कन छप्पड़ फाड़ी
तही सें दौलत बरसावै छै
सच्चा सुख संतोषी ‘बाबा’
देखी सुनी केॅ मुस्कावै छै।
