भारत की संस्कृति के लिए... भाषा की उन्नति के लिए... साहित्य के प्रसार के लिए

अंधो दूंहों / अर्जुन ‘शाद’

Kavita Kosh से
यहाँ जाएँ: भ्रमण, खोज

हवाउनि मां आक्सीजन खणन्दे
पंहिंजे जिस्म खे त इलाईंदो आयो आहियां
पर
रूह जे ज़ख़्म जी ऊन्हाई
जंहिं गहराईअ ताईं पहुची वेई आहे
तंहिं जे इलाज लाइ
कहिड़ियूं हवाऊं ॻोल्हियां?

ज़मीन ते रहंदे बि
ज़मीन खे पंहिंजी दिल अंदर जाइ ॾेई न सघियो आहियां
दीवारुनि जे अंदर महफ़ूज हूंदे बि
हमेशा पाण खे
खुलियल सड़कुनि ते सुम्हियलु महसूस कयो अधमि
हीअ राह बि हिक आहिड़ी राह आहे
जिते
जिअं जिअं अॻिते वधंदो वञा थो
तिअं तिअं
मुंहिंजनि अरयाननि जी लकीर
छिकिजंदी छिकिजंदी
खून जूं बूंदूं टपकाईंदी
दराज़ थींदी वञे थी
किये टुटण जो इम्कान ई नज़र न थो अचे
बेगानियत
बेहस अखियूं खणी
तूफान में
कखनि पखनि जियां
हिते हुते थफेड़ूं खाईंदी रहे थी।
हाणे तूं
इन्हनि खुलियल सड़कुनि खे ई पंहिंजो घरु करे ॼाणि
जे सड़कूं तोखे ॿियो केॾाहुं बि बठी बेन्दियूं
पर इहे तुंहिंजे घर ॾे रुख न रखन्दियूं।
हीअ ज़मीन
बाग़ बग़ीचा
सामूंडी किनारा
वारीअ जा मैदान
मुंहिंजे हवाले त आहिनि
पर ख़बर नाहे त छो
उहे बि खु़द मूंखे
पंहिंजाईअ जे अहसस ॾियण खां
क़ासिर आहिनि।

न ज़मीन ते पुख़्तो आहियां
न हवा में लटकियलु
आहियां अलाइ आहियां ई कोन
मुंहिंजो वुजूद छाहे
न तसव्वुफ़ न वेदान्त
कोई साथु नथो ॾिए
तारीख़ त ॼणु
पंजनि हज़ारनि सालनि जी तब्दीलुनि जो
वॾे में वॾो बखु
मूंखे बणायो आहे
वक़्त जे गर्दिश सां
इतिहास जी राकेट मां छोड़िजी
अची पियो आहियां अलॻ अलॻ बेटनि ते
जिते
चौधारी
कारे समुंड जूं कएं बलाऊं
पंहिंजूं ॼिभूं
कारतूसनि जे बाहि जियां कढी बीठियूं आहिनि
मुंहिंजो हर स्वासु
हर घड़ीअ
बिजलीअ जे खुलियल तारुनि में जकिड्जी
इलैक्ट्रिक शाक्स में वकोड़िजी वियो आहे
हिक जिस्म जा कएं हिस्सा
सभेई जीअरा आहिनि चेहरे खां सिवाइ
आवाज आहे
पर कटियलु ऐं चिचिरियलुक
मां पंहिंजे पूरे जोर सां
आवाज़ खे
माना जो आकार ॾियण जी कोशिश करियां थो
आवाज़ कननि जी ओट वठण बदरां
मुंहिंजियुनि अखियुनि साम्हूं सवाल बणिजी
गुस्से मां घूर करे निहारे थो
मां जुड्तू आवाज़ जो
सहारो वठां थो
पर जुड्तू आवाज़ सां
इन्सान
केसताई कुझु ॿुधाए सघन्दो?
शिकस्त
फटकनि जी सज़ा खाधल
बेॾोहीअ जियां
ज़मीन ते फाँ थी किरी पवे थी
ॻोढा
अज़खु़द
अखियुनि मां टपकी पवनि था
दिल जे दांहुँनि
पंहिंजो सुकून
पंहिंजी
दिल जी दांहँ में ई ॻोल्हे थी।

विछोड़ो
हिकु अहिड़ो दर्दु आहे
जेको ॾेखारी न ॾिए बि
कॾहिं अहिड़ी ॾेस्वारी थो ॾे
जो इन्सान इएं थे महसूस करे
त हीउ दर्दु
कहिड़ीअ बि ख़ुशीअ जो मफहूम
उजाड़े ख़त्म करे थो छॾे।

प्यार करण वक़्ति
मूंखे इहा ख़बर थोरोई हुई
त मां प्यार करे रहियो आहियां
इहा ख़बर त तॾहिं पेई
तॾहिं मूंखे तोखां धर कयो वियो
हींअर त बस आहे ख़ाली माज़ी
ऐं ज़हन में उकिरियल
तुंहिंजियूं प्यारियूं
तस्वीरूं
जेके ज़िन्दगीअ भरि
तस्वीरूं थी रहंदियूं
ऐं मुंहिंजे लाइ कॾहिं बि
हक़ीक़त जो रूप न वठंदियूं।

आम तौर त माउ ई कंहिं बार खे
गोद में बठन्दी आहे
हिते मूं पाण खे पाण उछलायो आहे
नईं माउ जी गोद में
असली माउ जो स्नेह कियां आणियां?
हिन दुख जूं गहरायूं त फक़त
पंहिंजी माउ ई परूड़े सघन्दी
नईं माउ खे कहिड़ी कल
दर्द में छिलियल दिल जी;

केई साल गुज़री विया आहिनि
अॼु तोखां जुदा थिये
तूं पंहिंजीअ छातीअ ॾे उछिलायल
मुंहिंजनि नंढिड़नि नंढिड़नि
अछनि अछनि नरम पेरनि जे छुहाअ खां
सिकियल आहीं
मां हिते गर्म गर्म गोद जे
अब्दी आराम खां महरूम
बिना ज़मीन भटकी रहियो आहियां।

धरती त धरतीअ जहिड़ी थींदी आहे
पर जंहिं धरतीअ
मूंखे पंहिंजे अज़ल सां अटिकाए छॾियो हो
उन धरतीअ जा छुहाअ
मां किथां आणियां?
वक़्त खां कटिजी वियलु
मुंहिंजे जीअण जो हर पलु
पंहिंजो पाण ताईं महदूद
न माजी, न मुस्तकबिल
जहिड़ी शुरूआत, तहिड़ी पछाड़ी
सियासत जी हवस-गीरीअ
मुंहिंजी सुञाणण जी तारीख़ ई मटाए छॾी।

कौमियत जे जज़्बे जो उसिरणु
पहिरियाईं पंहिंजे घर सां ई थिए थो
‘सबलेट’ थियल घर में
मां मालिकीअ जो कहिड़ो दम हणी सघां थो?
हक़ीक़त में मां फ़क़ीर ई त आहियां
जो हर दफ़े
हथ फहलाए
कुझु घुरां थो
पर तज़ाद त इहो आहे
जो मां पंहिंजे शर्म खे परचाइण लाइ
ऐं कमतरीअ जे अहसास खे लिकाइण लाइ
पंहिंजी खुद्दारीअ जी
झूनी तस्वीर खे
रंग रोग़न हणी
फ़खु़र सां पेश करियां थो
शायद मां रस्ते जो पत्थर ई आहियां
पत्थर खे काई क़ौमी सिफ़त न थींदी आहे
उन खे कंहिं बि परॻणे जे नाले सां न पुकारियो वेंदो आहे

ज़मीन खे भाङा करणु आसान आहे
दिल खे भाङा करण सां
बिजलीअ जो क़हरु पैदा थी सघे थो
ज़लज़लो बर्पा थी सघे थो
हीअ जा जलावतनी आहे
तंहिं में वतन त परे रहियो
तारीख़ ऐं तहज़ीब जे हज़ारनि सालनि जे
तसव्वुर खे ई मूं खां खसियो वियो आहे

मां हिकु सियासी निधणिको बणिजी
कॾहिं कंहिं राह ते
त कॾहिं कंहिं राह ते
भटकंदो रहां थो
ख़बर नाहे आखि़र
अंजाम कहिड़ो थींदो?

मुंहिंजो रूहनि जे भटकण में ऐतबार न आहे
पर अॼु महसूस करियां थो
त रूह पिण थींदा आहिनि
ऐं हिकु मुंहिंजो रूहु आहे
जेको हर तरफ़ भटकी रहियो आहे
ऐं शायद हमेशह भटकंदो रहंदो।

हीअ फ़रियाद बि अहिड़ी फ़रियाद आहे
जंहिं जे ॿुधण वास्ते
सारीअ दुनिया जे कोर्टुनि जा मुन्सिफ़
इन्सापफ ॾियण खां आजिज़ थी वेंदा आहिनि
जवाबदार कंहिं खे ठहिराइजे
सियासत जे सौदेबाज़ीअ खे
या धर्म ऐं मज़हब जे
सदियुनि खां गुमराह कंदड
हरफ़तबाज़ियुनि खे
जवाबदार खे शिकिल हूंदे बि शिकिल कान्हे
इन करे हू तलवार हथनि में खणी

बेलगाम क़त्ल कंदो रहे थो
कॾहिं कंहिं अबहम खे
पीउ माउ खां जुदा थो करे
त कॾहिं कंहिं नौवरनीअ खे
पंहिंजे घोट खां अलॻ थो करे
कॾहिं भेण खे भाउ खां
त कॾहिं प्रीतम खे प्रीतमा खां
परे थो करे
अंधे दूंहें जियां
चौधारी फहलजंदो रहे थो
ऐं कंहिं जी पकड़ में न थो अचे
मैदाननि या मंदरनि ऐं मस्जिदुनि मां निकरी
इन्सान जे सारे जिस्म में
ज़हर भरे थो छॾे।
अॼु मुंहिंजे सिर ते माउ जो सायो न आंह
इन करे मां
आवारागर्दीअ जो शिकार बणियां थो
मुंहिंजी आवारागर्दी
फ़क़त देस ताईं महदूद न आहे
इहा अन्तर्राष्ट्रीय हदुनि में पखिड़ियल आहे
मुंहिंजी हालत बि
ख़बर नाहे त
‘जिप्सियुनि’ जहिड़ी हालत थी रहंदी
या मूं वे बि किथे

साहु पटण जो मोक्ओ मिलंदो
मूं केई दफ़ा पंहिंजी हस्तीअ बाबत
पाण खे ख़ातिरी ॾियण लाइ
पंहिंजियुनि हासिलातुनि जी नुमाइश कई आहे
मगर अंदरु स्वाधलु अथमि
इहा बि का हस्ती चइबी
जेका दुनिया जे नक़्शे ते
कंहिं बि हंधि
पंहिंजी बाक्फ़ियत नथी ॻोल्हे सघे;
पंहिंजी तस्वीर खे
ॿियनि जी तस्वीर मथां अटिकाइण मां छा वरंदो?
आईने में ॾिसां थो त
मुंहिंजियुनि हासिलातुनि जे बावजूद
मूं खे सुञ ई सुञ पेई नज़र अचे
इन सुञ जी सूरत ॾिसी
मूं खे इएं थो लॻे
त मां ‘मां’ न रहियो आहियां
ऐं मुंहिंजे एवज़
मुंहिंजे साम्हूं आहे
हिकु बेजान पाछो
जंहिं जी सुञाणप
खुद मुंहिंजियुनि ई अखियुनि खां
गाइब आहे
मां इन आईने खे भञी
टुकरियूं टुकरियूं करे

फिटो करे थो छॾियां
ऐं
चपनि कननि ऐं अखियुनि वारे
साधारण चेहरे खे
ॾिसणु शुरू करियां थो
पंहिंजे चुरण-पुरण वारे जिस्म खे
हथ लॻाए
खु़श थियां थो
हींअर मां पंहिंजो पाण खां परे
काई दुनिया ॾिसण लाइ
तयार न आहियां
छो जो इएं करण सां
मां पंहिंजी मिलियल उमिरि जो
मियाद खतम करे सघां थो
इहा आहे मुंहिंजी जिस्मानी उमिरि
जंहिं खे ॿियो जनमु वरी न मिलंदो
ॿियो जनमु बि छा ते मिलंदो?
रूह खे ॿिये जनम बठण लाइ बि
ॿाहिरियों कालिब त घुरिजे ई
मूंखे ॿाहिरयों जिस्म जो क़ालिब
हूंदो ई कोन
त रूह छा में दाखि़ल थीन्दो?