भारत की संस्कृति के लिए... भाषा की उन्नति के लिए... साहित्य के प्रसार के लिए
अल्झेछ क्यारे पछ्यौरी / भूपी शेरचन
Kavita Kosh से
अल्झेछ क्यारे पछ्यौरी तिम्रो चियाको बुट्टामा
बल्झेछ क्यारे सुनको काँडा कलिलो खुट्टामा
आउँछे कि चेली भनेर आमा दोबाटो धाइथिन्
तीजमा पनि बिर्सेछ क्यारे गरीब माइती
सल्लाझैँ आमा सुसाइरहिन्, एक्लै कोठामा
अल्झेछ क्यारे पछ्यौरी तिम्रो चियाको बुट्टामा
छोरीलाई आशीष हाल्न पाइन अन्तिम सासैमा
भन्थे नि बाले आँसु खसाली टीकाको थालीमा
त्यै आँसु टीका पठाइदिऊँ कि, प्रवासको पतामा
अल्झेछ क्यारे पछ्यौरी तिम्रो चियाको बुट्टामा
भन्थे नि दाइले भाइटीकामा बहिनी फर्केला
क्षितिजमा जस्तै निधारमा हाम्रो इन्द्रेणी लर्केला
दिनभरि काग कराइरह्यो, बेलको ठुटामा
अल्झेछ क्यारे पछ्यौरी तिम्रो चियाको बुट्टामा
