अव्हांजो लीडर / हरूमल सदारंगाणी ‘ख़ादिम’
मञो
मञो न मञो
अव्हांजो लीडर आहियां मां
अव्हांजो एविज़ी
जाती ऐं देश जो शेवक।
कसम अव्हांजो
अव्हांजी मिठी जवानीअ जो
अव्हांजी जान
अव्हांजे हकनि... लइ लड़िणो अथमि।
विधान सभा हुजे
संसद हुजे
कि ॿियो को दल
पुछी सवाल
कराए बहाल के ठहराव
कढी बयान
लिखाराए ख़त
करे तारूं...
अव्हांजे लाइ
अव्हांजे ॿच्चनि... लइ लड़िणो अथमि।
ग़रीब आहियो अव्हीं
ऐं
अथव न पुश्त पनाह
अव्हांखे खाधो खपे
ॿालकनि खे खीर ऐं खंडु
बदन ढकण जे लइ कपड़ो
मथे मथां का छांव
तॻण जे लाइ बि
का नौकरी, दुकान खपे...
अव्हां खे
छा न खपे!
छा न खपे!!
छा न खपे!!!
मगर ॾियांव सलाह?
भाउरो!
मञो हीअ ॻाल्हि:
विसारे विंध छॾियो
हाणि हिंद जा आहियो
हाणि हिंद जा आहियो
भुलायो
जेकी पिरायुव अॻे
लिपी
अदब
ऐं ज़बान
नईं फ़िज़ा में
ख़यालनि खे ॾेई मोड़ नओं
वञो थी जज़्ब
ऐं
इतिहास में
अमर बणिजो।
कसम
त जेसीं
अव्हां खे
न दॻि लॻायो अथमि
न मेम्बरी मां छॾींदुसि
नकी ई अॻवानी
अव्हांजी शेवा में
जीवति सफल कंदुसि पंहिंजी
अव्हांजो ओनो
मूं खे
आहि
खुदि अव्हांखां वधीक
अव्हांजे शान वधाइण लाइ
बंगलनि में रही
हवाई सैर कंदुसि
”राॼधानी“ में फिरंदुसि...
अव्हांजे ग़म खे मिटाइण लइ
जाम मै पीअंदुसि...
भला
छा
नाहियां
अव्हांजो ई मुख?
निजो प्रमुख??
