आइ छात्रकेँ पड़ल प्रयोजन
माय बापपर औडर चाही,
स्नो चाही आ पौडर चाही,
क्लीपे लागल ककबा चाही,
चकबी संगहि चकबा चाही।
झाड़ फुनूस वृहत्तर चाही,
रेडीमेडे उत्तर चाही,
गेस-पेपरक मेला चाही,
बुद्धिक ऊपर ठेला चाही।
पढ़ब-लिखवसँ छुट्टी चाही,
माछ-मांस दू बुट्टी चाही,
प्रति प्रश्नक इन्जेक्शन चाही,
कोशिश हेतु कनेक्शन चाही।
किछु विद्रोही झण्डा चाही,
जलखै मुर्गी अण्डा चाही,
सगर नगर हुरदुंग मचाबय-
लय कोनो हथकण्डा चाही।
ड्रेन पाइप ठढ़मुत्ता चाही,
किन्तु न तनमे बुत्ता चाही,
बँसबिट्टीक छुछुन्नरि-मुहसन
नोक बला ओ जुत्ता चही।
आँखिक आन्हर वीक्षक चाही,
परम उदार परीक्षक चाही,
प्रथम-श्रेणी प्राप्त करयलय
तीर्थ-भ्रमण लय हो संयोजन
आइ छात्रकेँ यैह प्रयोजन।
रचना काल 1970 ई.