आखिरी बस / कृशिन राही
वक़्त मूंखे
इंतज़ार जी क़तार में
बीहारे वियो आहे।
इहो चई त
घुरिबल बस हितां मिलन्दइ
मां बिही बिही थको आहियां
या शायद
थकिजी बीठो आहियां
बस आई आहे
त चढ़ियो आहियां
पर सही बस में
ग़लत माण्हू ॾिसी
लही पियो आहियां
या ग़लत बस मे
सही माण्हू ॾिसी
चढ़ियो ई न आहियां।
वक़्तु गुज़िरन्दो रहियो आहे
ऐं सुवाल पुछन्दो रहियो आहे;
‘अञा इते ई बीठो आहीं?’
मां उहोई जवाबु डीन्दो आहियां:
‘अञा सही माण्हुनि सां सवार
सही बस न आई आहे।’
बस स्टाप ते
मां अकेलो रहिजी वियो आहियां,
वक़्तु चिताए वियो आहे
त हाणे जेका बस ईन्दी
सा आख़रीनि बस हून्दी।
कुझु वक़्तु अगु में
मां सोचे रहियो होसि
ही सभु माण्हू
ग़लत बस में सवार सही माण्हू
या सही बस में सवार ग़लत माण्हू
केॾांहुं वञी रहिया हुआ?
केॾांहुं विया?
किथे पहुता?
ऐं हाणे सोचियां पियो
हिन आखि़री बस में
चढ़ण या न चढ़ण में
कहिड़ो फ़र्कु वञ रहियो आहे।
