आदि के अंत / मथुरा प्रसाद 'नवीन'

जे सुरू होबऽ हइ
ओकर अंत भी जरूरी हइ
आदि के
अंत भी जरूरी हइ
ओ देखो, ऊ के है?
आराम से
खा के पसर रहले हे,
चलल नै जा है
तइयो अपन पेट भर रहले हे
है तो कठिन रोग
तइयो ऊ पचा रहले हे
कचौड़ी अउ महनभोग
खाय के आदत जेकरा
ऊहे सब खा हइ,
खाय बाला लोग
तनी ने लजा हइ
सजा बस गरीब के
मजा मारऽ दोसरे हइ,
लड़ै बाला गरदिस में
मजा मार दोसरे हइ
जेहे माल पैदा करै
ओकरे नै माल हइ
जेहे अन्न उपजावै
रोटी नै दाल हइ।