भारत की संस्कृति के लिए... भाषा की उन्नति के लिए... साहित्य के प्रसार के लिए
लोक संगीत
कविता कोश विशेष क्यों है?
कविता कोश परिवार

आमाको आशीर्वाद / दीपक शम्चू

Kavita Kosh से
यहाँ जाएँ: भ्रमण, खोज

मेरी आमाले
कोक्रोमा हल्लाउँदा–हल्लाउँदै
निश्छल विचार भरिदिएकी थिइन् मस्तिष्कमा
भाँडाकुँटी खेल्दा–खेल्दै
संसार जित्ने शक्ति दिएकी थिइन् पाखुरीमा ।

काखमा राखेर सिलोक गाउँदै
सुमधुर स्वर भरिदिएकी थिइन् गलामा
आँगन डिल लगेर क्षितिज देखाउँदै
रमणीय दृष्य छरिदिएकी थिइन् आखाँमा

मुटुभरि माया
ओठभरि हाँसो भरिदिएर
अघि बढ्ने बाटो
देखाइदिएकी थिइन् आमाले ।

उदास अनुहारमा बहार छाइदिने
नीरस जीवनमा प्रेमको खेती गर्ने
रहर थियो ।

घामको भारी बोकेर हिँड्दा–हिँड्दै
लुटियो मैले गाउने गीतको भाका
भत्काइयो थाकेको बेला बिसाउने शीतल चौतारी ।

मेरो मुटु निचोरेर कैद गरियो
ओठबाट फुत्किनै लागेको मुस्कान
यतै कतैबाट मेरो हातको इन्द्रधनुष खोसेर
नजरमा फालिएको हो तुवाँलो
यहीँबाट कोही कसैले लुटेर मेरो आँसु
झोसिएको हो परेलीमा आगो ।

त्यही आगोको ज्वाला लिएर निस्कदैछु
यति विघ्न फैलिएको ऐझेरु जलाएर
सिर्जनाको फूल रोप्न ।