आसिन के पहिल भोर / रूपम झा

आयल आसिन के पहिल भोर
स्वगत मे खग सभ करय शोर

चारू दिश शीतल मंद पवन
फूजल रविक राजीव नयन
धरतीक पुष्पित आँचर पर
सरिता लै अछि चंचल हिलोर
आयल आसिन के पहिल भोर

झरि गेल धरा पर हरसिंगार
अनुपम अछि ई फूलक पथार
शीतक मोती छिरियायल अछि
नेना सन नभ के लाल ठोर
आयल आसिन के पहिल भोर

खग कलरब सँ अछि तृप्त कान
आयल कण-कण मे नवल प्राण
सुगबुगा रहल अछि नव किसलय
अछि सजल धराक पोर-पोर
आयल आसिन के पहिल भोर