Last modified on 17 अक्टूबर 2013, at 12:18

आ बैठ बात करां - 7 / रामस्वरूप किसान

आ बैठ बात करां

हां,
थूं सोचती हुसी स्यात
कै रोज ई तो
करां हां बात

पण म्हैं सोचूं -
इत्ता दिन तो
अंधारौ ढ़ोयौ है
बात कठै करी
थूक बिलायौ है।

म्हनैं लागै -
पाणी पर
फूसकै ज्यूं
सरकती रैयी लारै
बखत पर तिरती
बा बात

अर आपां
पींवता रैया
नीतरेड़ो बखत
दिन-रात

आ, बातां रा
नुंवां बारणा खोलां
होठां रा किवाड़
मूंद बावळी !
काळजै सूं बोलां
जठै सामट्यौ पड़यौ है
सो कीं
ढ़ाई आखरां

आ बैठ/बात करां।