भारत की संस्कृति के लिए... भाषा की उन्नति के लिए... साहित्य के प्रसार के लिए
ईच्छा / अशोक शुभदर्शी
Kavita Kosh से
हुनी बनैलकै
आपनोॅ घर
बड़ोॅ
अलीशान
सुंदर
भव्य
आधुनिक
रहै वास्तें
महानगर के पास इलाका में
आपनोॅ बीबी-बच्चा के साथें
जगह नै छेलै
वै घरोॅ में
चाचा-चाची
भाय-बहिन
भतीजा-भतीजी केॅ तेॅ छोड़ोॅ
आपनोॅ माय-बापोॅ केॅ वास्तें भी
थोड़ोॅ टा
वै घरोॅ में छै
एक ठो टेढ़ोॅ जग्घोॅ
रहै लेली
विदेशी नस्ल के कुत्ता लेली ।
