उहा शायद कविता ई थी सघी थे / हरीश वासवाणी
नदी उलटी वही रही आहे
समुंड खां पहाड़ ॾांहुं
(पंज सेकंड शांती)
ज़बान विञाए वेठल बादल
पिञियल कपह जी दज़ बणिजी
मैदाननि में रुली रहिया आहिनि
जिनि पंहिंजी विजु इनसानी अखियुनि में
ओते छॾी आहे
शहरनि जा टावर्स
ॼमी वियल रत जे बर्फ़ सां ढकियल आहिनि
(पंज सेकंड शांती)
पहाडु नंगो आहे
जंहिं जो अक्सु
शीशो थी वियल ढंढ जे फ्रेम में बंद आहे
(ॾह सेकंड शाती)
उन जे हेठां हिक वसीअ वादी आहे
जंहिं में हिकु डिंगो फिॾो चौरु आहे
चीर जे किनारनि ते
ॿ वण उभा बीठा आहिनि
जिनि जूं पाडूं खाॼी चुकियूं आहिनि
ऐं पन
पनु पनु थी कखु पनु थी विया आहिनि
वणनि जे निरात्म टारियुनि ते
हिकु मुअलु पखी वेठो आहे
पखीअ जो जिस्मु
वणनि में विरहाइजी वियो आहे
पर उन जा ॻातल गीत
सालिम रहिजी विया हुआ
खेतनि जी सांति गूंज
पूरी वादीअ में ज़िन्दा आहे।
(पंद्रहं सेकंड शांती)
असुल में इहो हिकु क़दीम पखी हो
जंहिं वहदत लाइ वॾो तपु कयो हो
पर
क़तरे खे आबु समुझण में निसफल वियो हो।
(ॿ सेकंड शांती)
विरधाता खेसि हिकु सिरापु ॾिनो हो
तूं या जीअन्दें या उॾामन्दें
पखीअ जीअण जे मोह में
ज़िन्दगीअ जी चूंड कई
ऐं खंभ समेटे
वणनि जे विच में वेही रहियो
इहो सोचे
आसमान खे त हेठां बि ॾिसी सघिजे थो
हर सरउ
संदसि खंभ चोराईन्दी रही
हिकु हिकु करे संदसि सभु
खंभ ग़ाइबु थी विया
जॾहिं हिकु हॾाओं पिञिरो वञी बाक़ी बचियो
तॾहिं खेसि ख़ायाल आयो
हुन ज़िन्दगीअ जी न
मौत जी चूंड कई हुई।
पखीअ जे गीतनि जो आवाजु़
ऐं परनि जे आवाज़ में हिकु भेद आहे
ऐं उहो भेदु ई संदसि ज़िन्दगी आहे।
इन अहसास सां ई
पखीअ जी दिल टुटी पेई।
(के सेकन्ड शान्ती)
इन जी कंहिं खे सुधि कान पेई
सिवाइ उन नदीअ जे
जेका उन सिराप मुक्तीअ लाइ
उल्टो सफ़रु करे रही हुई।
(पंज सेकन्ड शान्ती)
नदी जॾहिं पहाड़ ताईं पहुती
पहाड़ खे चौधारी आगि घेरे वेई हुई।
अजीब मंज़र हो
आगि हेठि लही रही हुई
पाणी मथे चढ़ी रहियो हो
ऐ काइनात में हिक नईं
वहदत जो जनमु थी रहियो हो।
(पंज सेकन्ड शान्ती)
वण छिरिकी उथिया
न ॼाणि छा सोचे
उहे धीरे धीरे हलण लॻा
ऐं पोइ उॾामण लॻा
पाणीअ ऐं बाहि में समाइजी
(ॾह सेकन्ड शान्ती)
ॿाफ़ थी विया
उन वक़्ति ख़ला में हिकु पड़ाॾो उभिरियो
भूंइ ॾांहुं...
वापस वरण जी
इहा हिक राह आहे
(पंज सेकन्ड शान्ती)
भूंइ ॾांहुं...
वापस वरण जी
इहा बि हिक राह आहे
(पंज सेकन्ड शान्ती)
भूंइ ॾांहुं...
वापस वरण जी
इहा ई हिक राह आहे।
(शान्ती)
