ऐं ॾाहिरीअ जो वापस मोटी अचणु / हरीश वासवाणी
हू (हिक ॾाहिरीअ जो वापस न मोटणु’ किरदार- ॾाहिरी)
जो लहरुनि तां पंध कन्दो विञाइजी वियो हो
मोटी आयो।
(समुंडु उन जी अमानत खे समाए न सघियो)
सन्दसि हस्ती कढी
लहरुनि खेसि उछिलाए छॾियो।
चवनि था
धरतीअ जो बि इहो ई धर्मु आहे:
हस्ती कढी, उछिलाए छॾणु।
समुंड जे चौधारी वारी हुई
माण्हुनि वारीअ ते ई
घर जोड़िया हुआ
बिंदिरियुनि छितियुनि जूं के अॾावतूं-
जिनि हर क़द जो अहम, ऊचाई
ख़तम थे कई,
उन्हनि में रहन्दड़ इनसान
खेसि धार्मिक पुरुष लॻा।
वारीअ ऐं पाणीअ जे विच में
के ॿेॾियूं फाथल हुयूं
ॿेड़ियुनि जे काठियुनि ते के
कलंक उॻियल हुआ
जिनि खे खू़बसूरत सेव्हण ढके थे छॾियो।
ॿेड़ियुनि खे हलाईन्दड़ मांझी
कथा नायकनि खां अलॻ हुआ।
उन्हनि जे मन में स्मगलर्स् वारो
आतम विश्वासु हो
ऐं चेहरनि ते डिफ़ेक्टर्स जो आतम सन्तोषु।
परियां को ॻेरो
विच विच में ॻाए थे उथियो
”अल्लहु ॾिए पियो, असीं खाऊं पिया“।
हितां हुतां के जुवान छोकिरियूं
(जे संस्कृतीअ जे कतबि ईंदियूं हुयूं)
कोरस आवाज़नि में
उन सां सुर में सुर मिलाए रहियूं हुयूं
‘अल्लहु ॾिए पियो, असीं खाऊं पिया’
संस्कृतीअ जो गीतु गुनगुनाईन्दो
हू जीअं वापस वरियो ई थे
जादूई असर हेठि ई
जिते खेसि पहुचायो वियो
उते गुल ई गुल हुआ
खेसि पक थी वेई
-इहो ई मसाणु आहे।
गुल रतु गोॻारे रहिया हुआ।
सन्दसि वर्ताउ
खु़द ब ख़ुद मुर्दनि जहिड़ो थी वियो।
हुन सड़ियल गुलनि जूं
ॾांडियूं कठियूं कयूं
ऐं पंहिंजे क्रिया कर्म जो
इंतज़ामु करण लॻो।
अचानक कि ॼर पैदा थी
हुन आतम समर्पणु कयो
‘अग्नेय यज्ञमध्वरे विश्वेनः परिभूरसि स इद्देवेषु गच्छित’ (ऋग्वेद, अग्नि सूत्र, 1970-40-76)
पर अगिनी खेसि अधु जलाए मुक्त थी वेई
(बाक़ी सन्दसि भ्रम जली विया)
हू विश्वासु ई नथे करे सघियो
पाणी ऐं बाहि जो सुभावु
हिकु कीअं थी वियो?
(खेसि को बि ॿिन्ही मां स्वीकार छो न थो करे!)
मुर्दे जे रूप में बि हू तिरस्कृत हो।
