ओकरोॅ सीन्है में जबेॅ दिल केॅ ने पैलेॅ होतै
केना केॅ रिस्ता उमिर भर के निभैलेॅ होतै
होतै सीता लेॅ केन्होॅ मोॅन कि जखनी रामें
पुल लेॅ पानी में पत्थरोॅ केॅ गिरैलेॅ होतै
कौनें पूछै छै दिलोॅ केॅ कैन्हें गिराय देलियै
अभियो गिरलोॅ होतै होनै - के उठैलेॅ होतै
मानलौं जुटलोॅ होतै जलसा में सब एक सें एक
हमरा नै पाबी केॅ सब शोर मचैलेॅ होतै
जेकरा देखलेॅ नै छियै ओकरा बतैय्यौं केना
कोय गोड़ॉे सें छुवी केकरौ जिलैलेॅ होतै
राजदरबार छेकै हेना में केना कहबै
मंथरै गद्दी लेॅ तरकीब सिखैलेॅ होतै
कहिया के छेकै ऊ शायर ई पता छै हमरा
हमरे गजलोॅ केॅ पढ़ी मंच जमैलेॅ होतै
हिचकी पर हिचकी कैन्हें आबै छै अमरेन्दोॅ केॅ
के छै आपनोॅ यहाँ जें चर्चा चलैलेॅ होतै
-13.6.91