भारत की संस्कृति के लिए... भाषा की उन्नति के लिए... साहित्य के प्रसार के लिए
ओळूं जाळ / चंद्रप्रकाश देवल
Kavita Kosh से
ओळूं री मकड़ी
बोली-बोली आपरै मूंडै सूं राळ काढ
बधायां जावै हहै
आपरै जाळा रा घेरा
घेरा माथै घेरा
उणनै कीं बेरौ नीं
कठालग औ अणथाक सिलसिलौ
हालैला यूं
जांणै जूंण
उण आंती आय
अेक दिन धार ली
के धाप नै ओळूं कर कराय
निवेड़ दे
वौ जांणतौ ई कोनीं हौ
खरचियां तर-तर बधै आ बलाय
सीर बायरी घड़ै नै दे झळकाय
आपरै जाळा रै मज्झ आधेटै बैठी
मकड़ी
सेवट-अेक न अेक दिहाड़ै
काठी आंती आय
इण जाळा रा सगळा झीणा तांता
गिट जावैला
पण वठा लग वौ कांई करै
जठा लग
चितार-चितार ओळूं आमीज नीं जावै
वठा लग
उणनै करणीज पड़ैला
उडीक।
