ओ चित्रकार ! / अमर गिरी

• हिन्दी/उर्दू
• अंगिका
• अवधी
• गुजराती
• नेपाली
• भोजपुरी
• मैथिली
• राजस्थानी
• हरियाणवी
• अन्य भाषाएँ

अमर गिरी »

Script

• Devanagari
• Roman
• Gujarati
• Gurmukhi
• Bangla
• Diacritic Roman
• IPA

ओ चित्रकार !
तिमीले जुन चित्र बनाइरहेछौ
त्यो मेरो होइन ।
त्यहाँ मेरो शिर, हात र खुट्टाहरू छैनन्
त्यहाँ मेरा आँखा, नाक र ओठहरू छैनन्
त्यहाँ मेरा सुख-दुःख
आँसु-हाँसो
प्रेम-घृणा
र, राग-विरागहरू छैनन् ।
ओ चित्रकार !
तिमीले जुन चित्र बनाइरहेछौ
त्यो मेरो होइन ।
त्यहाँ मेरा ढुकढुकी र सुस्केराहरू छैनन्
त्यहाँ मेरा घात-प्रतिघात, उहापोह र द्वन्द्वहरू छैनन्
त्यहाँ मैले हिँडेको बाटो
मैले गाएको गीत
मैले बजाएको बाजा
मैले नाचेको नृत्य
मैले खेलेको खेल
मैले देखेको सपना
केही पनि छैनन् ।
ओ चित्रकार !
ओ मेरो समयका नायक !
तिमीले जुन चित्र बनाइरहेछौ
त्यो मेरो होइन ।
ओ चित्रकार !
तिमी चित्र बनाइरहेका छैनौ
त्यसको विनिर्माण गरिरहेछौ ।