कइसे गुजर अब होइ अइसे गुजरिया
धन्धा न पानी।
सूनी परी है जइसे सारी नगरिया
धन्धा न पानी॥
आपनि बिथा हम रोई पथरन के आगे
हमरे करेजे मइहां मुसवा हैं लागे
झांझर परी है हमरे मन की चदरिया
धन्धा न पानी॥
कारी अंधेरिया दउरै लै लै कै लाठी
लकड़ी कै घोड़वा लादे लोहे कै काठी
हमरे करम मा नाहीं कउनौ उजेरिया
धन्धा न पानी॥
हउसन प पाला परिगे सपना झुराने
सातिर सिकारी द्याखौ बइठे मुहाने
का जानी अब को लेई हमरी खबरिया
धन्धा न पानी।