भारत की संस्कृति के लिए... भाषा की उन्नति के लिए... साहित्य के प्रसार के लिए
कतना कहियो हम अपन कहानी / सिलसिला / रणजीत दुधु
Kavita Kosh से
कतना कहियो हम अपन कहानी
सर के ऊपर बहे लगलो पानी
घर में ठंडा हे चुल्हा आउ चउका
कोय न´ छोड़े ठूल करे के मउका
पानियो ले न´ पुछे अपन धानी
कतना कहियो हम अपन कहानी
माँगे बुतरू खेलउना, मेहरी साड़ी
ठेललो पर न´ टसके हमर गाड़ी
याद आवे हमरा अपन नानी
कतना कहियो हम अपन कहानी
माँगलुँ रोटी मिलल हमरा लाठी
मार खा, छोटा होल कदकाठी
माटी में मिलल हमर जवानी
कतना कहियो हम अपन कहानी
न´ कर सकऽ ही अब तो हम खेती
बियाहे जुकुर होल मुनिया बेटी
हमरा ले इंगोरा होल बानी
कतना कहियो हम अपन कहानी
काहे न´ ला देला तो टी. भी.
छोड़ नइहर चल गेलखुन बीबी
सरकार चलनी से भरवे पानी
कतना कहियो हम अपन कहानी
जब हो गेलो मँहगाई तिगुना
तब जाके, दरमाह होल दोगुना
कइसे बनइबइ बुतरूवन ले ज्ञानी
कतना कहियो हम अपन कहानी
