कर दिया कत्ले आम तन्नै क्यूं कुणबा घाणी करदी / मुकेश यादव
कर दिया कत्ले आम तन्नै क्यूं कुणबा घाणी करदी
जार्ज बुश बेइमान तन्नै या बुरी कहाणी करदी
सारी दुनिया जाणै सै रै या, लोकतन्त्र की जंग कोन्या
तेल के कुएं चाह्वै हड़पना सद्दाम तै बिल्कुल तंग कोन्या
तेरी नीयत नै जाण गए ये घणे देश तेरै संग कोन्या
ले कै तलाशी हमला कर दिया, बात निमाणी करदी
टोनी बलेयर लिया साथ में, फिर-फिर कै तू चरण लग्या
जनमत की तन्नै परवाह कोन्या, दोष बिराणै धरण लग्या
सद्दाम हुसैन के ढूंढ बहाने, चीर इराकी हरण लग्या
यू.एन.ओ. की मानी ना रै वा तै आणी-जाणी करदी
टैंक चला कै गोळे दागे, कती शर्म आयी ना
बाळक बूढ़े औरत मारे, कती तेरै स्याही ना
विरोध-प्रदर्शन खूब हुये, पर तेरी समझ आई ना,
अमेरिकी जनता भी रूक्के मारै, या तै मोटी हाणी करदी
फियादीनी दस्ते बण पत्थर, तेरी छाती ऊपर चढ़ग्ये
आत्मघाती बणे इराकी, घणे कसूते अड़ग्ये
छाती के म्हं बम बांध, तेरे टैंक कै नीचै बड़ग्ये
कह ‘मुकेश’ ईब कट्ठे होल्यो, क्यूं बात बिराणी करदी
