कहाँ छै हमरोॅ हिन्दुस्तान / ब्रह्मदेव कुमार
कश्मीर सेॅ कन्याकुमारी ताँय
झम-झम झमकै प्राण
कहाँ छै हमरोॅ हिन्दुस्तान ?
प्राच्य क्षितिज पर लाली छिटकथैं
होय छेलै मधुर विहान
फुदकै छेलै फुच्ची-चिरैयाँ
बुलबुल गावै गान
कहाँ छै हमरोॅ हिन्दुस्तान ?
जहाँ गुरूकूल गमकै छेलै
संस्कारी छेलै ज्ञान
भारतीय संस्कृति केरोॅ पताका
लहरावै सकल जहान
कहाँ छै हमरोॅ हिन्दुस्तान ?
माता-पिता-गुरू के चरणों मेॅ
नित सेवा-सम्मान
नारी यहाँ छेलै देवी स्वरूपा
घर छेलै स्वर्ग समान
कहाँ छै हमरोॅ हिन्दुस्तान ?
जहाँ नालन्दा-विक्रमशीला
विश्व शिक्षा संस्थान
ज्ञान विज्ञान योग अध्यात्म के
लहरै छेलै ज्ञान
कहाँ छै हमरोॅ हिन्दुस्तान ?
गुरू वशिष्ट आरो संदीपुनी मुनि के
चरणों मेॅ भगवान
जहाँ सुग्गां गावै छेलै
उचरै वेद-पुरान
कहाँ छै हमरोॅ हिन्दुस्तान ?
सबरी रोॅ जूठोॅ बेर खाय केॅ
खुश कŸोॅ छेलै राम
प्रीत रोॅ रीत जुड़ाबै छेलै
पुलकै छेलै प्राण
कहाँ छै हमरोॅ हिन्दुस्तान ?
रास रचाबै वृन्दावन में
छलिया कृष्ण महान
छेड़ै छेलै वंशी सेॅ कŸोॅ
मिट्ठोॅ-मिट्ठोॅ तान
कहाँ छै हमरोॅ हिन्दुस्तान ?
वेद व्यास जैसनोॅ ज्ञानी
दानी कर्ण समान
विवेकानन्द फहराबै जग में
धर्म-ध्वजा अभिराम
कहाँ छै हमरोॅ हिन्दुस्तान ?
धर्म-कर्म आरो ज्ञान-ध्यान मेॅ
भारत के शीर्ष स्थान
विश्व गुरू के तेज सेॅ दमकै
जगमग हिन्दुस्तान
कहाँ छै हमरोॅ हिन्दुस्तान ?
जहाँ राजा हरिश्चन्द्र जैसनों
सत्य-निष्ठा के शान
महाराणा प्रताप आरो वीर शिवाजी
धरती के वीर जवान
कहाँ छै हमरोॅ हिन्दुस्तान ?
जहाँ नारी देवी सन पूजित
घर-घर देवस्थान
मैया दुर्गा मैया काली
सरस्वती लक्ष्मी के मान
कहाँ छै हमरोॅ हिन्दुस्तान ?
जहाँ कन्या-पूजन परम्परा
जग के करै कल्याण
जननी के गरिमा-गौरव के
विश्व करै बखान
कहाँ छै हमरोॅ हिन्दुस्तान ?
धन्य-धान सेॅ भरलोॅ-पुरलोॅ
वैभव केरोॅ खान
सोना रोॅ चिड़ियाँ कहाबै छेलै
कहाँ गेलै ऊ पहचान
कहाँ छै हमरोॅ हिन्दुस्तान ?
वीरता के इतिहास सेॅ भरलोॅ
भारत केरोॅ जान
लक्ष्मीबाई वीर कुँवर सिंह
भगत सिंह केरोॅ प्राण
कहाँ छै हमरोॅ हिन्दुस्तान
