की सखि, साजन? / भाग - 21 / दिनेश बाबा
201.
लूट, मार, व्यभिचार, रोजीना,
अकछ करी, जें देलकै जीना,
धरम छै जेकरा सें शर्मिंदा,
की सखि डाकू?
नहीं, दरिंदा।
202.
जहाँ, नै कोय सुनवाई होय छै,
अंतिम वहीं, सजाई होय छै,
जहाँ से घुरना, नैं आसान,
की सखि कोर्ट?
नैं, शमशान।
203.
जे, सूपर स्टार सें, ऊँचा,
हर फिल्मी किरदार सें, ऊँचा,
मद्धिम नैं भेल जेकरो आभ,
की सखि ‘दिलीप’?
नैं, ‘अमिताभ’।
204.
बड़ा यशश्वी नाम छै जेकरोॅ,
वहू सें बढ़लोॅ काम छै जेकरोॅ,
फिल्मी जगत के छै महताब,
की सखि शाहरूख?
नैं, अमिताभ।
205.
स्वामी के देलोॅ, लिवास में,
मुख्य द्वार पर, महल खास में,
शैल्युट दै-दै बढ़बै शान,
की सखि नौकर?
नैं, दरबान।
206.
गौना संग ही, जे, आबै छै,
बदन खूब, जें, गरमाबै छै,
नैं गरमी में करै मिताई,
की सखि पत्नी?
नहीं, रजाई।
207.
लोहा नै, इस्पात कही लेॅ
पकिया जिनको, बात कही लेॅ,
देशोॅ लेली काटकै जेल,
की सखि ‘गाँधी’?
नहीं, ‘पटेल’।
208.
तन, मन, धोॅन जवानी देलकै,
आजादी के, मानी देलकै,
देश हितोॅ में जीलै नाहर,
की सखि ‘गाँधी’?
नहीं, ‘जवाहर’।
209.
आगू, की की होय वला छै
पाना कुछ या खोय वला छै,
रोज बनाय यही समीकरण,
की भूमंडलीकरण?
नैं, उदारीकरण।
210.
टक-टक करी निहारै चान,
जेना प्रेम में देतै जान,
पिया क ताकै, चोरी-चोरी,
की सखि प्रेमी?
नहीं, चकोरी।
