भारत की संस्कृति के लिए... भाषा की उन्नति के लिए... साहित्य के प्रसार के लिए
कुछ तेॅ तकदीर रोॅ दीवार उठाबै में छेलै / अमरेन्द्र
Kavita Kosh से
कुछ तेॅ तकदीर रोॅ दीवार उठाबै में छेलै
बाकी भूसे हेनोॅ माँटी में सनाबै में छेलै
ओकरोॅ आँखी में लोर कत्तेॅ छेलै नै देखलौ
हाँसी हाँसी केॅ जे लोगोॅ केॅ हँसाबै में छेलै
तोरा तेॅ मिललौं तिलक ओकरा कहोॅ की मिललै
जे कि भुखलोॅ रहीकेॅ वोट जुटाबै में छेलै
आग आखिर में नरीं ओकरै ही लगा देलकै
जेकि उपछी केॅ लोर आग बुझाबै में छेलै
हमरोॅ हत्या के पता चलतियै केना केॅ कहोॅ
कोय लाशोॅ केॅ कोय्यो खून मिटाबै में छेलै
जरतेॅ बस्ती में केना बचतियै ही ओकरोँ घोँर
यहेॅ सोची ऊ आपनोॅ घोॅर जराबै में छेलै
केकरौ चललै नै पता कखनी लुटलै अमरेन्दर
हेनोॅ मदमस्त दिले केॅ ऊ लुटाबै में छेलै
-12.3.93
