भारत की संस्कृति के लिए... भाषा की उन्नति के लिए... साहित्य के प्रसार के लिए
कुण जमीन रो धणी / कन्हैया लाल सेठिया
Kavita Kosh से
कुण जमीन रो धणी ?
हाड़ मांस चाम गाळ
खेत में पसेव सींच,
लू लपट ठंड मेह
सै सवै दांत भींच,
फाड़ चौक कर करै जोतणी’र बोवणी
बो जमीन रो धणी’क ओ जमीन रो धणी ?
मद पिवै उड़ै मजा
करै जुलम सैंकड़ी,
ठग बण्या ठाकरां
हिद हुई हैंकड़ी,
रात दिन रैत नैं लूंटणी’र खोसणी,
ओ जमीन रो धणी’क बो जमीन रो धणी ?
हळ जुप्यो जद बिक्या
फूस पान टापरो,
पेट काट बीज री
करी जुगाळ बापड़ो,
पड़ी छांट कया हरख रामजी भली सुणी,
ओ जमीन रो धणी’क बो जमीन रो धणी ?
खड़ी फसल करा कुड़क
भरै ब्याज बाणियूं,
बळद बेच ब्याज रै
ब्याज नै उधाणियूं,
राज सीर चोर कै के करै’र करसणी,
ओ जमीन रो धणी’क बो जमीन रो धणी ?
कुण जमीन रो धणी ?
