भारत की संस्कृति के लिए... भाषा की उन्नति के लिए... साहित्य के प्रसार के लिए
कूकड़ी सूत काचैरी / मोहम्मद सद्दीक
Kavita Kosh से
कूकड़ी सूत काचैरी
धावरो मोल करवालै
डगर है डोर चरखै री
मजलरी तोल करवालै
ताकळो है घणो तीखो
मिनख री जूण बिलमालै
बैठज्या। सूत सुळझालै।
चणै कद भाड़ फोड़ी है
गादड़ां गांव कद लूटया
मिनख री आंख फोड़ी है
फलकरा चांद कद टूट्या
चींतणो छोड चीखतो रै
जीतणो त्याग हार तो जा।।
ठिठकतो जा टसकतो रै
सरकतो जा सिसकतो रै
निवड़तो जा तरसतो रै
बिडरता जीव कुण पालै
बैठज्या सूत सुळझालै
बिलखती जूण बिलमालै।।
बिखरतो जा बिगसतो रै
उमसतो जा उमंगतो रै
निसरतो जा निखरतो रै
डगर सब डोर चरखै री
मजल रो मोल करवा लै।
