भारत की संस्कृति के लिए... भाषा की उन्नति के लिए... साहित्य के प्रसार के लिए
केकरऽ केकरऽ बात करै छौ / खुशीलाल मंजर
Kavita Kosh से
बाबू हो बाबू माय गे माय
केकरऽ भरोसा पर काटबऽ आय
सभ्भे छै सभ्भे रं करनी छै एक
केकरौ दिलऽ में नै कुच्छ बिवेक
जेकरा जे जखनी आबै छै
बुड़बक खन बनाबै छै
आबेॅ की होतै हमरा पछताय
बाबू हो बाबू माय गे माय
ऐन बकतऽ पर धोखा देतौं
उलटा सीधा खूब पढ़ैतौं
के छे खराब आरो के छै नीक
लागतौं हेनऽ कि सब ठिक्के ठीक
सभ्भे छै एक्के केटली के चाय
बाबू हो बाबू माय गे माय
आबेॅ की माथा पर हाथ धरै छी
केकरऽ केकरऽ बात करै छी
सभ्भे तेॅ खेलै छै नुक्का चोर
हमरा मचैला सें की होतै सोर
कत्तो करौं हम्में उपाय
बाबू हो बाबू माय गे माय
तनिटा गलती तेॅ है रं पिड़ैलकै
धरती पर मछरीर हमार तड़पैलकै
तहियो नै उठलऽ छै आभियो विस्बास
नै जानौं कथीलेॅ करलऽ छी आस
सब गुड़ माँटी हालं की खंभऽ माय
बाबू हो बाबू माय गे माय
