कोरे कोरे कागज मँगाओ राजा बाबुल / बुन्देली

बुन्देली लोकगीत   ♦   रचनाकार: अज्ञात

लोकगीतों की भाषा चुनें अवधी कन्नौजी कश्मीरी कुमाँऊनी खड़ी बोली गढ़वाली गुजराती गोंड छत्तीसगढी निमाड़ी पंजाबी बाँगरू बांग्ला बुन्देली ब्रजभाषा भदावरी भोजपुरी मगही मराठी माड़िया मालवी मैथिली राजस्थानी संथाली संस्कृत हरियाणवी हिन्दी हिमाचली देखें

कोरे कोरे कागज मँगाओ राजा बाबुल
सो सुध बुध लगुन लिखाओ हो रम्मा।
सुरन गौ को गोबर मँगाओ राजा बाबुल
सो ढिक धर अँगन लिपाओ हो रम्मा।
गज मोतिन के चौक पुराओ राजा बाबुल
सो कंचन कलश धराओ हो रम्मा।
चंदन पटरी डराओ राजा बाबुल
सो अमृत अरग दिबाऔ हो रम्मा।
पाँच सुपारी हरदी की गाँठें राजा बाबुल
सो मुहर अढ़ाई डराओ हो रम्मा।
सुरन गौ कौ गोबर न पूजै मोरी बेटी।
सो गौआ कौ गोबर मँगाओ हो रम्मा।
गज मोतिन के चौक न पूजै मोरी बेटी
सो चून के चौक पुराओ हो रम्मा।
कंचन चौक न पूजै मोरी बेटी
सो माटी के कलश धराओ हो रम्मा।
चंदन पटरी न पूजै मोरी बेटी
सो छेवले की पटरी डराओ हो रम्मा।
अमृत अरग न पूजै मोरी बेटी
सो गंगाजल अरग दिवाऔ हो रम्मा।
सोने की मोहरें न पूजै मोरी बेटी।
सो रूप रूपैया डराओ हो रम्मा।