ख़तु / प्रेम प्रकाश
पपा!
हिन भेरे मुंहिंजे एकवीहें जनमदिन ते
तव्हीं छा मोकिलीन्दा?
हूंअ हमेशा
तव्हां पंहिंजी पसंद मोकिली आहे!
बुधुमि तव्हीं मूं लाइ
हिकु घोटु ॻोल्हे रहिया ओहियो
दुबई, हांगकांग, लंडन, अमेरीका मां!
मूंखे त अञा पपा खपे!
मूंखे त अञा पपा खपे
जंहिं सां मुंहिंजो नंढिड़ो ॿालपणु ॻाल्हाए
मां अञा ॿालपण में ई आहियां
वॾी कान थी आहियां!
हिन भेरे बि तव्हीं न अची सघो त
मूं लाइ हिक साहेड़ी गुॾी मोकिलिजो
जेका मूंसां मुंहिंजी
नानीअ जी ॿोली ॻाल्हाए
ॾाॾीअ जहिड़ियूं आखाणियूं बुधाए!
मूंखे मोकिले सघो
त हिन भेरे मोकिलिजो
ममीअ लाइ रुअणु!
हूअ चवन्दी आहे हिन कुटुंब में अचण बाद
कुंवार हिकु ई भेरो रुअन्दी आहे
जॾहिं संदसि घोटु कमाइण लाइ
परदेस वेन्दो आहे!
हूअ चवन्दी आहे
पपा ॾाढा रुपया मोकिलीन्दो आहे
सिर्फ़ रुपया माकिलीन्दो आहे!
पपा,
तव्हां मूंखे
ॾींहुं ॾींहु वॾो थीन्दो कान ॾिठो आहे
पोयनि सालनि में पंज भेरा आया आहियो
हर भेरे चवन्दा आहियो
तूं एॾी वॾी थी वेईंअं!
मुंहिंजी दिल चवणु चाहीन्दी आहे
तव्हीं पंज भेरा आया आहियो
मां अञा पंजनि ॾींहंनि जेतिरी
ई वॾी थी आहियां!
पपा!
ममी खाइण खां अगु हमेशा
पहिरियों गिरहु ठाहे
थाल्हीअ अन्दर ई पासे में अलॻ रखन्दी आहे
रोटी खाइण बाद हूअ
उहो गिरहु भिति ते रखी ईन्दी आहे
पपा
हूअ कंहिंजे लाइ कढन्दी आहे गिरहु?
हिन दफ़े पपा
तव्हां मूं लाइ सूखिड़ी
समुंड पार जो को घोटु ॻोल्हियो त
पोइ मूंखे पिणि
ममीअ जियां
हिकु ई दफ़ो रुअणो पवन्दो!
ऐं हर दफ़े
थाल्हीअ में पहिरियों गिरहु रखिणो पवन्दो!!
पपा!
हिन भेरे मुंहिंजे एकवीहें जनमदिन ते
तव्हीं छा मोकिलीन्दा?
(भॻति- 1998)
