भारत की संस्कृति के लिए... भाषा की उन्नति के लिए... साहित्य के प्रसार के लिए
गउना बदलिगा हमार / बोली बानी / जगदीश पीयूष
Kavita Kosh से
गउना बदलिगा हमार
अंगना बखरी दुआर
भूली मुंशी जी के घरे कै पढ़ाई माई जी
बदला रस्ता पैंडा ताल औ तलाई माई जी
नाहीं जात चकरी
काँडी मसूर गगरी
नाहीं कूदै सिकहर पै बिलाई माई जी
बदला रस्ता पैंडा ताल और तलाई माई जी
बनै नवा नवा घर
केहू छोट ना जबर
करै नई तकनिकिया भलाई माई जी
बदला रस्ता पैंडा ताल औ तलाई माई जी
बाबा खोंखैं खटिया
नाहीं कटै रतिया
करैं अपने जमाना कै बड़ाई माई जी
बदला रस्ता पैंडा ताल और तलाई माई जी
