भारत की संस्कृति के लिए... भाषा की उन्नति के लिए... साहित्य के प्रसार के लिए
गीतां री दीठ !/ कन्हैया लाल सेठिया
Kavita Kosh से
हाल ओळखूं हूँ
पीड़ रो उणियारो
कोनी पड़ी मोटी
म्हारै गीतां री दीठ
हाल है सबदां री
चिमठी में साच
मती अपड़ा मनैं
कलम री ठौड़ डांगडी,
ओज्यूं साव काचो है
थारो ‘भोग्योड़ो जथारथ’
थाळी‘र माचो है
खाली उपलबधि,
जिनगानी कोनी रखेल
ओ मोटो तथ
भूलगी सुवाद र लारै हू‘र
थारी अधभोळी सिंग्या
थरप्या हा घणी चिंतणां स्यूं बडेरा
मिनखाचारै रा सासता मोल
तूं कर नुंईं सिरजणां
मांड मजल रै मारग में
कुंआरा खोज,
कोई क्यूं करसी अखेज ?
पण मती काट
सिरै नांव रा नादीदा
सळू सटै दूजती भैंस !
