भारत की संस्कृति के लिए... भाषा की उन्नति के लिए... साहित्य के प्रसार के लिए
गीत जिनिगी के गावल ह आपन धरम / जयकांत सिंह 'जय'
Kavita Kosh से
गीत जिनिगी के गावल ह आपन धरम
चोट खा-खा हँसावल ह आपन धरम
साध जिनिगी के सध ना सकल साँच बा
आस अनकर पुरावल ह आपन धरम
हँ जी, भटकीले दुनिया ई भटकावेले
राह जग के देखावल ह आपन धरम
मीत जेही मिल मतलबे के मिल
पर मिताई निभावल ह आपन धरम
देखीं जेकरा के फँसल बा मद मोह में
ओह से खुद के बँचावल ह आपन धरम
आसरा आज फेर बात से फिर गइल
बात कह के पुरावल ह आपन धरम
आँख के पानी सब गिर गइल गाँव के
पानी गँवईं जोगावल ह आपन धरम
रात-दिन उठ-बइठ बीचे बेईमान के
सत्व से मान पावल ह आपन धरम
