भारत की संस्कृति के लिए... भाषा की उन्नति के लिए... साहित्य के प्रसार के लिए
गुलाब हम कन्ने रोपूँ? / सतीश मिश्रा
Kavita Kosh से
हमर चारो दने हे इंगोर-
गुलाब हम कन्ने रोपूँ?
उतरल हे धरती पर चिनगी के डोली,
अगजा तो जिन्दा हे, मर गेल होली,
अमवाँ के डउँघ बइठ गिधवन के टोली
झोरित हे मोजर टिकोर-
गुलाब हम कन्ने रोपूँ?
चूल्हा के धुआँ ला सिसके बँडे़री,
कचबच गरबइया ला कुँहके मुँडे़री,
अँगना में टँगना पर चनकऽ हे रेंड़ी,
उधिआएल लँहगा-पटोर-
गुलाब हम कन्ने रोपूँ?
जाड़ा के पोर-पोर सीत निअन फोका,
बदरी के बाम उगल बन के पनसोखा,
अगिआएल जेठ दे हे मिरगा के धोखा,
दगिआएल उतरऽ हे भोर-
गुलाब हम कन्ने रोपूँ?
