ज़बान ऐं गले जा ही ज़ख़म
हाणि त लाइलाज पिया लॻनि!
पंद्रहीं आगस्ट ते छुटलु उहो तीरु
असांखे घायल करे
समुंड में तरन्दड़ हिन ॿेड़ीअ तें खुपी वियो!
असां त अञा
पंहिंजी ॿोली सिंधीअ में लोलियूं बुधी
रुअणु ऐं खिलणु सिखी रहिया हुआसीं
थोरी समझ अचण ते
सभु सहण जी हेर पइजी वेई।
ऐं जुवान थियण ते-
याद करे -भुलिजी वञण जी!
हाणि जॾहिं हीउ शरीरु
टुंगिरि ॿेड़ी हलाए थकिजी पिया आहिनि-
वॾो थी वियो आहे सूराखु़ उन तीर जो!
पाणी बि अचण लॻो आहे ॿेड़ीअ में!
हाणि उहा कीअं तरन्दी?
ऐं केसताईं?
असांखे डपु आहे
शायद जल्दु हिक ॾींहुं
असीं दरियाह में अन्दर हून्दासीं
हज़ारनि लखनि मछियुनि साणु तरन्दासीं।
बुॾण खां बचण लाइ
वक़्त जे पाणीअ में थाफोड़ा हणन्दे
ज़रूरी सभु ॿोलियूं ॻाल्हाइण लॻन्दासीं!
पंहिंजे ॿोलीअ में फ़क़त अकेलो रुअणु
ऐं ॿियनि सां खिलणु बचन्दो!
पोइ किनि थोरनि खे समझ में ईन्दड़
इशारा कन्दासीं!
समुंड में रही
हर मगरमछ सां दोस्ती कन्दासीं।
हज़ारनि रंगीन अणछुहियल किताबनि जा पना फाड़े
सुहिणियूं ॿेड़ियूं ठाहीन्दासीं
सोनहिरी मछियुनि साणु
मुहाणनि वटि मोकिलण लाइ
टुॿकनि ऐं लीकुनि में
पंहिंजी दांहं लिखन्दासीं!
बेड़ियुनि वारा अदा मुहाणा
उहे शिला लेख
समुंड किनारे मिटीअ जे ढेर ते
रखन्दा वेन्दा-
पले वारो-
जोतियुनि साणु उन जो निगहबानु थीन्दो
धीरे धीरे कंहिं ॾींहुं हिकु नओं
‘जीअरनि जो दड़ो’ ठही वेन्दो
ऐं इएं हिक ॾींहुं मुंहिंजी गूंगी ॿोली
अमर थी वेन्दी!