भारत की संस्कृति के लिए... भाषा की उन्नति के लिए... साहित्य के प्रसार के लिए
घर-अेक / ॠतुप्रिया
Kavita Kosh से
आज म्हूं गई
म्हारै पुराणै मुहल्लै में
बठै देख्यौ
म्हारौ छोटो सो घर
जिण रै किवाड़ां लारै
म्हूं लुक ज्यांवती
घणकरी बार
म्हूं देखती रैयी
घर नै भौत देर तांईं
ओळ्यूं रै मिस
केठा किंयां आयग्या आँसू
आँख्यां स्यूं बारै
सोचूं
कै कदी खरीद’र
सूंप स्यूं बापू जी नै
इण घर री चाबी
बापू जी रौ सपनौ हो
औ’ घर
जिको बेच दियौ
स्यात म्हारै सपनां सारू।
