घिटी आतमकथा लिखे थी / एम. कमल
हर घर जे, हर रंग खे
हर कुंड खां जाचे थी
घिटी आतम कथा लिखे थी।
कहिड़ियुनि हवाउनि जो
हितां गुज़रु थियो
कहिड़ा सोना हरण
किनि लाइ, नाज़ भरियूं
छलांगूं ॾीन्दा
हितां आया विया
कहिड़नि नारनि हिते होली खेॾी
कहिड़ा चेहरा खुर्स़ कया
कहिड़ा मुंहांडा स्याह कया
ज़हन तां सभु नक़्श
छंडे छाणे उतारे थी,
घिटी आतमा कथा लिखे थी।
कंहिं छांव जे बहाने
बाहि जा वण पोखिया
कंहिं पिरह जहिड़ीअ सीतल शान्ति में
टाक मंझंदि जी तपति उछिली
कहिड़े घर में
चार ई पहर बती ॿरन्दी रही
ऐं क़हिड़े घर में
ॾियो न ॿरियो ॾियारीअ जो
सभु सोचे सारे थी
घिटी आतमा कथा लिखे थी।
कहिड़नि पकनि घरनि जो
मीहं वाचूड़े भरमु भोरे रखियो
ऐं कचे रंग जा ढक धोई
भितियुनि खे उघाड़ो कयो
कंहिं किरियल घर खे
लफ़्जी अफ़सोसु दानु कयो
ऐं कंहिं छपर जी छाया बख़्शी
सभिनी जी चिठी वाचे थी
घिटी आतमा कथा लिखे थी।
कहिड़नि घरनि मां
गै़रतमंदनि जूं कायूं खॼियूं
ऐं कहिड़नि शर्म फ़रोशनि
ऊचियूं माड़ियूं अॾियूं
कहिड़े घर जो ॿुंभो
मंदर जहिड़ो हुओ
ऐं पुठियों दरु, गंद जो अॾो
कहिड़े घर मां
दुर्ग/न्ध् जे दरिया उथिली
नगर खे लोढ़े ऐं लोए रखियो,
कंहिं कंहिं हुन ते दाग़ करे
बेजे़ब कयो
बेजे़ब करे, बदनाम कयो
सभिनी जा रू रविश याद रखे थी,
घिटी आतमा कथा लिखे थी।
