भारत की संस्कृति के लिए... भाषा की उन्नति के लिए... साहित्य के प्रसार के लिए
घूमण गाम गया था / दिनेश शर्मा
Kavita Kosh से
मैं घूमण गाम गया था रै
मेरे ना आया पहचाण
ना किते हेली ना किते नौरा
ना माट्टी का रह्या मकान
ना दामण अर कुड़ता आडै
ना कंठी का नामो नशान
ना जोहड़ अर ना किते कुँए
के नेजु डोल का काम
कित सैं भजनी कित वें जोगी
जो सदा गावैं थे राम
नींब अर पीपल ग़ायब होगे
ना घणी दूर तक छाम
छुपम छपाई ना हरे समंदर
ना बालक करैं धमाल
चूल्हे की रोटी सादा खाना
ना दिखैं सैं इब आम
ना बलदां का जोड़ा दिखदा
ना डांगर ढोर का लार
हल अर हाली दिखैं कम सैं
ट्रैक्टरां की होइ भरमार
सुख शांति का टोटा होग्या
रही बाक़ी भागम-भाग
दिनेश कित तै ढूँढ कै ल्यादूं
मिट्या भाईचारा तमाम।
मैं घूमण गाम गया
