घूमै छै शीतल मैया / अंगिका

गलियाँ-गलियाँ घूमै छै शीतल मैया- कोई नहीं जागै छै आधी रतिया हे।
एकेॅ जागै मड़वाड़िन की बेटिया- आँचला वेसावै सारी रतिया हे।
गलियाँ-गलियाँ घूमै छै मालत मैया- कोई नहीं जागै छै आधी रतिया हे।
एकेॅ जागै हलवैया की बेटिया- बतासा बेसावै सारी रतिया हे।
गलियाँ-गलियाँ घूमै छै धनसरो मैया- कोई नहीं जागै छै आधी रतिया हे।
एकेॅ जागै पसारिन की बेटिया- घूमना बैसावै सारी रतिया हे।
गलियाँ-गलियाँ घूमै छै फूलसरो मैया- कोई नहीं जागै छै आधी रतिया हे।
एकेॅ जागै सोनारिन की बेटिया- बालिया बेसावै आधी रतिया हे।
गलियाँ-गलियाँ घूमै छै कालिका मैया- कोई नहीं जागै छै आधी रतिया हे।
एकेॅ जागै मालिन की बेटिया- फूलवा बेसावै आधी रतिया हे।
गलियाँ-गलियाँ घूमै छै सभाई मैया- कोई नहीं जागै छै आधी रतिया हे।
एकेॅ जागै गुआरिन की बेटिया- दुधवा बेसावै सारी रतिया हे।