चँड-यात्रा / अर्जुन ‘शाद’
कंहिं थे समझियो त कॾहिं इन्सान
पंहिंजे क़दमनि में रखी चँडु
चढ़ी जन ते विहंदो
आफ़रीन तुंहिंजी शुआअत खे
बहादुर इन्सान!
तुंहिंजी हिम्मत खे सलाम आहे
सब्जीअ दुनिया जो
अक़्ल, हिम्मत जो बराबर तो कयो आहि कमाल
कीन तअज्जुब थो लॻे
तुंहिंजी करामत ते मगर
तो कयूं चर्ख़ अखियूं आहिनि
अॻु भी हिन खां
तुंहिंजूं ईजादूं अनोखियूं आहिनि
पल में आवाज़ ऐं खु़द तसवीरूं
कीअं न पहुचनि थियूं हजारनि मेलनि तां
खूब विज्ञान जी थी आहि तरक़्क़ी;
तो पटिया आहिनि कुदरत जा
बू/टियल दर
अॻु भी हिन खां
तोखे मालूम आ
विज्ञान जो हिकु ॿियो भी पहलू आ
जो ख़तरनाक ऐं केॾो न भयानक पहलू आ
जो तरक़्क़ीअ खे तंज़ल में मिटाइणु थो घुरे
जो ॿियुनि क़ौमुनि खे रख बणाइणु थो घुरे।
केरु ॼाणे ही चँड ते पहुचणु
इन इरादे खां मुक्त भी आहे?
जो करणु चाहे थो
फ़ासिला पंहिंजे ताबे
अहिड़ी तजबीज़ हुजे जंहिं मूजिब
पाण ज़िंदा हुजूं, दुनिया खे बणायूं मुर्दा!
वरना हू चँड तां आया बि खणी छा आहिनि?
के मिट्टीअ जूं लपूं ऐं टुकर पत्थरनि जा
ऐं विया आहिनि जंहिं जे एवज़
अरबें रुपया
कोई सोचे त ज़मीन खे आहे
का ग़र्ज़ मिट्टीअ जी?
घुरिज हिति आहि
अञा पत्थरनि जी?
खू़ब पत्थर था मिलनि
खूब मिले थी मिट्टी
न मिले थी पर खाइण लइ
हिति रोटी
था किरोड़नि में हिते
बुख में पाह थियनि
न अझो आहि उन्हनि खे
न बदन लइ कपड़ो
कहिड़े कम जा ही सफ़र तुंहिंजा थिया
ओ मथे चँड ॾे बेंदड़ राही?
चँड जी ज़ाति न मिट्टी आहे
हुस्न ई चँड जो तआरुफ़ आहे
न मुहबत असीं ख़ाक सां धारियूं काई
था असीं प्यार रखूं चांदिनीअ जे भाकुर सां!
