भारत की संस्कृति के लिए... भाषा की उन्नति के लिए... साहित्य के प्रसार के लिए
चलो गाजी बॉर्डर बुलावै ईब नहीं घबराना हे / रणवीर सिंह दहिया
Kavita Kosh से
चलो गाजी बॉर्डर बुलावै ईब नहीं घबराना हे॥
संघर्ष के दम पै अपणा आज हक़ पाना हे॥
1.
जल्दी करलयो पीणा खाणा
इस जिसा ना मौका थ्याणा
फेर हमनै ना पड़ै पछताणा
संघर्ष करकै हक़ पाणा, यो पूरा हाँगा लाणा हे॥
संघर्ष के दम पै हमनै अपणा हक़ पाणा हे॥
2.
जमा नाट गये देखो हाँ भरकै
धरने जलूसों से इणनै डरकै
मंत्री भकाजया कदे आ करकै
फ़ाइल फेर जमा नहीं सरकै, रोज़ का ही फरमाणा हे॥
संघर्ष के दम पै हमनै अपणा हक़ पाणा हे॥
3.
बुलंद होवेंगे उड़ै म्हारे नारे
निजीकरण नै घाले सैं घारे
घणे दुखी मज़दूर कर्मी सारे
ठेकेदारी प्रथा सारे कै ल्यारे, मिलकै पाठ पढ़ाणा हे॥
संघर्ष के दम पै हमनै अपणा हक़ पाना हे॥
4.
संघर्ष बिना नहीं सै गुजारा
जल्दी चालां हजारों हजारां
सरकार हैरान हो देख नज़ारा
रणबीर लिखता साथी म्हारा, ना पाछै क़दम हटाणा हे॥
संघर्ष के दम पै हमनै अपणा हक़ पाना हे॥
