भारत की संस्कृति के लिए... भाषा की उन्नति के लिए... साहित्य के प्रसार के लिए
चाल मुसाफिर / संजय आचार्य वरुण
Kavita Kosh से
चाल मुसाफिर मारग खोजां
सोच मती तू रूकणै की
आगै बध जा पीछे मत मुड़
बात मती कर थमणै की।
हिरदै में विष्वास थरपलै
कुछ ना कुछ तो पाणौ है
जग में ईष्वर भेज्या है तो
कुछ न कुछ कर जाणौ है
मन में इच्छावां पैदा कर
सोच बहुत कुछ करणै की।
चाल मुसाफिर मारग खोजां
रस्तै बीच रूकावट आसी
बाधा आसी पग पग में
बिन कुछ करियां गया जगत सूं
तो क्यूं आया इण जग में
जद तक थारी ठौड न आवै
सोच मती तू थमणैं की।
चाल मुसाफिर मारग खोजां
तेल पून सूं लड़ै है दिवलौ
फेर भी बो हारै कोनी
जकै काळजै हिम्मत होवै
बो अबखायाँ धारै कोनी
तू दिवलौ बण मिटा अंधेरौ
सोच मती तू बुझणै की।
आगै बध जा पिछे मत मुड़
बात मती कर थमणै की।
